به گزارش رها، دفتر مطبوعاتی ریاست اجرائیه از اشتراک داکتر عبدالله در نشست مجمع جهانی اقتصاد در شهر داووس سویس خبر داده است.
در خبرنامه دفتر مطبوعاتی ریاست اجرائیه آمده است، داکتر عبدالله عبدالله امروز سه‌‌شنبه(۲ دلو)، به دعوت رسمی مجمع جهانی اقتصاد وارد داووس سویس گردیده است.
خبرنامه افزوده که داکتر عبدالله در مراسم افتتاحیه این اجلاس اشتراک کرده و در چندین نشست درباره افغانستان، منطقه و جهان سخنرانی می‌کند. او هم‌چنین با تعدادی از نخست‌وزیران، رؤسای سازمان‌های بین‌المللی، نمایندگان عالی‌رتبه کشورها، سازمان‌ها و شخصیت‌های بین‌المللی دیدار می‌کند.
اجلاس مجمع جهانی اقتصاد امسال امروز(۲ دلو) برابر با ۲۲ جنوری ۲۰۱۹ آغاز می‌شود و تا پنج روز ادامه می‌یابد.
