کمک های انسان دوستانه سازمان ملل از طریق تاجیکستان به افغانستان می رسد
مقامات تاجیکستان می‌گویند کمک‌های بشردوستانه سازمان ملل از طریق این کشور به افغانستان می‌رسد.
به نقل از اسپوتنیک، وزارت خارجه تاجیکستان می گوید در ۲۶ نوامبر، با کمک دولت تاجیکستان، مراسم آغاز کمک های بشردوستانه به افغانستان از طرف برنامه جهانی غذا “WFP” سازمان ملل برگزار شد.
اعلامیه می افزاید: «کمک های بشردوستانه، متشکل از ۲۵۰۰ تن آرد گندم است که از طریق پاسگاه‌های سرحدی تاجیکستان و افغانستان به منطقه بدخشان این کشور ارسال می‌شود.»
در ادامه اعلامیه این وزارت‌خانه آمده است: «انتقال کمک های بشردوستانه در زمانی صورت می گیرد که شهروندان افغانستان به خصوص باشندگان مناطق دورافتاده کوهستانی با نزدیک شدن سرمای زمستان دسترسی محدودی به مواد غذایی دارند.»
وزارت خارجه تاجیکستان تاکید دارد در حال حاضر سازمان های بین المللی و کشورهای کمک کننده به این مناطق دسترسی ندارد، همچنان تاجیکستان قصد دارد تا در خاک خود زمینه حمل و نقل تجهیزات بشردوستانه را فراهم کند.
