عبدالله عبدالله، رییس اجرایی کشور پیش از ظهر امروز (جمعه، ۱۰ عقرب) در رأس یک هیأت بلندرتبه‌ی دولتی به‌منظور اشتراک در «هجدهمین نشست سران حکومت‌های سازمان همکاری شانگهای» عازم تاشکند، پایتخت ازبیکستان شد.
ریاست اجراییه در اعلامیه‌ای گفت آقای عبدالله ضمن اشتراک در نشست سران حکومت‌های سازمان شانگهای، به نمایندگی از دولت جمهوری اسلامی افغانستان در این نشست سخنرانی می‌کند.
به نقل از اعلامیه، رییس اجراییه قرار است در حاشیه‌ی این نشست با نخست‌وزیران روسیه، ازبیکستان، قزاقستان، قرغیزستان، تاجکستان، معاون اول رییس‌جمهوری ایران، وزیر دفاع هند، سکرترجنرال سازمان همکاری شانگهای و اعضای بلندرتبه‌ی شماری از کشورها ملاقات می‌کند.
گفتنی است که در نشست سران حکومت‌های سازمان همکاری شانگهای در تاشکند درباره‌ی تحولات سیاسی – امنیتی منطقه، همکاری‌های اقتصادی، سرمایه‌گذاری‌های مشترک، توسعه، مقابله با دهشت‌افکنی، افراط‌گرایی و چالش‌های مشترک منطقه‌ای بحث و گفت‌وگو می‌شود.
