ایمل هاشور، سخنگوی بانک مرکزی، روز یک‌شنبه، بیست‌ونهم ثور گفت شورای عالی بانک مرکزی به سه دلیل عمده جواز کار آرین‌بانک ایرانی را در افغانستان لغو کرده است.
رعایت نکردن قانون و مقرارت بانک‌داری افغانستان و دستورهای بانک مرکزی افغانستان و همچنین سهم ناچیز این بانک در رشد و توسعه اقتصادی افغانستان، سه دلیلی است که سخنگوی بانک مرکزی از آن به عنوان مبنای تصمیم شورای عالی بانک مرکزی برای لغو جواز کار آرین‌بانک نام برد.
بانک مرکزی افغانستان حدود دوونیم ماه پیش جواز فعالیت حبیب‌بانک پاکستانی در کشور را نیز لغو کرده بود. دلیل این اقدام نیز رعایت نکردن «قوانین و دستورات » بانک مرکزی از سوی حبیب‌بانک و نقش ضعیف این بانک در توسعه اقتصادی کشور خوانده شده بود.
ایمل هاشور می‌گوید شورای عالی بانک مرکزی جواز آرین‌بانک و حبیب‌بانک را به صورت هم‌زمان لغو کرده است.
آرین‌بانک تنها بانک ایرانی در افغانستان است که حدود ۱۵ سال پیش در افغانستان آغاز به کار کرد.
