گفت و گوی تلفنی رئیس جمهور تاجیکستان با پوتین/همکاری ها برای حفاظت از مرز تاجیکستان و افغانستان تقویت می شود
ولادیمیر پوتین؛ رییس جمهوری روسیه در گفتگویی تلفنی با همتای تاجیک خود امام‌علی رحمان در مورد امنیت و حفاظت مرز تاجیکستان و افغانستان گفتگو کرد.
به نقل از خاور تاجیکستان این گفتگو روز دوشنبه (۱۲ میزان) انجام شد.
سران دو کشور روابط دوجانبه مشارکت استراتژیک بین‌المللی و چشم اندازهای توسعه و گسترش آنها گفتگو کردند.
در این گفتگو در مورد تقویت بیشتر همکاری‌های دو کشور در زمینه امنیت از جمله تقویت مادی و فنی حفاظت مرز تاجیکستان و افغانستان با در نظر گرفتن تحولات اخیر در افغانستان نیز بحث شده‌است.
طرفین توافق کردند به تماس‌های منظم خود در مورد وضعیت افغانستان ادامه دهند.
تاجیکستان اخیرا با طالبان در تنش شده و حتی گزارش شده دو طرف در مرزها نیرو جابه جا کرده‌اند.
این تنش پس اظهارات پی هم رییس جمهوری تاجیکستان در مورد تشکیل دولت فراگیر در افغانستان بروز کرد.
طالبان تاکید امام‌علی رحمان مبنی بر تشکیل دولت فراگیر در افغانستان را مداخله می‌دانند.
ملا عبدالغنی برادر؛ معاون اول رییس دولت طالبان گفته‌است، تاجیکستان در امور داخلی افغانستان مداخله می‌کند. او هشدار داد هر اقدامی واکنش نیز خواهد داشت.
ملا برادر می‌گوید که طالبان به کشورهای همسایه اجازه نخواهد داد درگیری فرقه‌ای و قومی به راه اندازد.
از سویی هم به نظر می‌رسد روابط طالبان و تاجیکستان بر سر جبهه ملی مقاومت به رهبری احمد مسعود؛ پسر احمد شاه مسعود نیز تیره شده‌است.
اخیرا برخی رسانه‌ها گزارش دادند تاجیکستان به پایگاه جبهه مقاومت ضد طالبان تبدیل شده‌است.
گفتنی است تاجیکستان پس از سقوط دولت به دست طالبان هم، تحرکات نظامی خود در مرز افغانستان را به خاطر تهدیدات داعش گسترش داده‌است.
