طالبان: تاجیکستان همسایه خوبی است!
د نیوز گزارش کرد که روح الله عمری یک عضو کمیسیون فرهنگی طالبان در وزارت اطلاعات و فرهنگ روز گذشته (چهارشنبه 14 میزان) گفت تاجیکستان همسایه خوبی برای افغانستان است، اما افغانستان اجازه نمی دهد که تمامیت ارضی اش توسط کسی مورد تجاوز قرار بگیرد.
روح الله عمری گفت: “وزارت خارجه با تمامی کشورها برای برقراری روابط حسنه در تماس است. با تاجیکستان در خصوص تمامی مسائل گفتگو خواهیم کرد.”
لازم به ذکر است که پس از آنکه تاجیکستان میزبانی شماری از رهبران مخالف طالبان شد و در اجلاس سالانه سازمان ملل نیز از نحوه تشکیل دولت موقت توسط طالبان انتقاد نمود، در مظان اتهام طالبان مبنی بر دخالت در امور داخلی افغانستان قرار گرفت.
ملا عبدالغنی برادر در واکنشی تند به گفته های امامعلی رحمان گفت که تاجیکستان در امور داخلی افغانستان دخالت می کند و این اقدام تاجیکستان با واکنش طالبان همراه خواهد بود.
به دنبال آن، روسیه از تاجیکستان و مقام های طالبان در افغانستان خواست تا تنش هایشان را از راه منطقی حل کنند.
