عمران خان صدراعظم پاکستان که در شهر دوشنبه پایتخت تاجیکستان برای اشتراک در نشست همکاری های شانگهای بسر می برد گفته است با امامعلی رحمان رئیس جمهور تاجیکستان بر آشتی دادن میان پشتون ها و تاجیک های افغانستان کار می کند.
تلویزیون سمای پاکستان در گزارشی در وبسایتش به نقل از عمران خان نوشته است: “با امامعلی رحمان هر مسیر ممکنی را برای برقراری صلح بخصوص میان دو قوم پشتون و تاجیک در افغانستان آزمایش می کند.”
عمران خان در جلسه ای با تاجران پاکستان و تاجیکستان گفته است: “تمام تلاش مان را می کنیم تا مطمئن شویم آنها با هم آشتی می کنند و دولتی فراگیر تشکیل می دهند.”
وی افزود: “دعا می کنیم و امیدواریم که پس از 40 سال درگیری، صلح در افغانستان برقرار شود.”
صدر اعظم پاکستان همچنین گفت که صلح در افغانستان برای اتصال و تجارت پاکستان و تاجیکستان بسیار مهم و حیاتی است.
لازم به ذکر است که در نشست سازمان همکاری های شانگهای، افغانستان امسال حضور ندارد.
سازمان همکاری های شانگهای در سال 1996 با هدف تمرکز همکاری های چند جانبه میان دولتی در بخش های اقتصادی، امنیتی و فرهنگی و برای تعادل قدرت و نفوذ آمریکا و ناتو در منطقه توسط چین، روسیه، تاجیکستان، قزاقستان و قرقیزستان تاسیس گردید که بعدها کشورهای افغانستان، پاکستان، هند، ایران، ازبکستان، بلاروس و مغولستان نیز به آن پیوستند.
افغانستان از سمت شمال بیش از 1300 کیلومتر با تاجیکستان مرز مشترک دارد و با پاکستان از سمت شرق نزدیک به 2240 کیلومتر مرز مشترک دارد.
