اتمر به تاجیکستان رفت
وزارت امور خارجه اعلام کرد محمدحنیف اتمر، سرپرست این وزارت در رأس یک هیأت بلندرتبه‌ی دولتی به شهر دوشنبه، پایتخت تاجیکستان رفت.
در خبرنامه‌ای که از سوی وزارت خارجه به نشر رسیده، آمده است این هیأت بلندرتبه‌ی دولتی صبح امروز (پنج‌شنبه، ۲۷ سنبله) در سفر دو روزه بنا بر دعوت رسمی سراج‌الدین مهرالدین، وزیر خارجه‌ی تاجیکستان به این کشور رفته است.
به نقل از خبرنامه، سرپرست وزارت خارجه در جریان این سفر خود با امام علی رحمان، رییس‌جمهوری، قاهر رسول‌زاده، صدراعظم، سراج‌الدین مهرالدین و سیدمؤمن یتیم‌اوف، رییس کمیته‌ی دولتی امنیت ملی تاجیکستان دیدار و گفت‌وگو می‌کند.
وزارت خارجه گفته است که بحث‌ها و مذاکرات در این دیدارها روی تقویت هرچه بیشتر روابط دو کشور در بخش‌های امنیتی و سرحدی، ترانسپورت، سرمایه‌گذاری، تحارت و ترانزیت و انرژی متمرکز می‌باشد.
آقای اتمر را در جریان این سفر شماری از مقامات دولتی، والیان و اعضای مجلس‌های نمایندگان و سنا همراهی می‌کند.
