چین به تاجیکستان در محافظت مرزهای این کشور با افغانستان کمک می کند

دولت تاجیکستان امروز دوشنبه در بیانیه ای گفت که این اقدام چین وضعیت امنیتی تاجیکستان را بهبود می بخشد.

مقامات تاجیک گفته اند دولت این کشور به کمیته امنیت ملی تاجیکستان دستور داده تا موافقت نامه ای را با کشور به چین به امضا برسانند که بر اساس آن، چین در کار ساخت 11 پوسته امنیتی بزرگ و کوچک در نوار مرزی تاجیکستان-افغانستان و یک مرکز آموزشی برای آموزش نیروهای سرحدی به تاجیکستان کمک می کند.

لازم به ذکر است که افغانستان و تاجیکستان به طول 1،345 کیلومتر با هم مرز مشترک دارند.

این مرز طولانی همواره نگرانی هایی را برای مقامات در دوشنبه به دنبال داشته است، زیرا به گفته آنان، قاچاقبران مواد مخدر هر از گاهی با نیروهای سرحدی تاجیکستان وارد درگیری مسلحانه می شوند و یا طالبان فعالیت هایشان را در این خط مرزی افزایش می دهند.

چین که به گفته کارشناسان امور سالانه بیش از 2.5 میلیارد دالر به تاجیکستان کالا صادر می کند اوایل سال جاری میلادی یک پوسته امنیتی در مرز تاجیکستان-افغانستان برای تاجیکستان ایجاد کرد.